أقوى درس تعلمته عن البرسونال براند 🔥

السوشال ميديا انتقلت من شبكة أشخاص إلى شبكة اهتمامات

قبل، الناس كانت تتابع الأشخاص

إذا حبيت شخص، بتابعه وبتشوف كل شيء ينزله

اليوم، الخوارزميات غيرت اللعبة

ما عاد السؤال: “مين بتتابع؟

صار: “شو المحتوى اللي رح يخليك تكمل مشاهدة؟

الخوارزمية بتتعلم اهتماماتك، وبتوصلك بمحتوى اشخاص ممكن ما عمرك سمعت عنهم

تحب الطبخ؟ رح تشوف طبخ

تحب العقار؟ رح تشوف عقار

تحب السيارات؟ رح تلاقي مجتمع كامل حول السيارات

حتى الأشخاص اللي بصيروا ترند ممكن يكونوا ناس أول مرة بتشوفهم، لأن محتواهم لامس اهتمام عند عدد كبير من الناس

وهذا غير طريقة بناء البرسونال براند

اليوم ما بكفي تكون مشهور

الأهم: تكون معروف بشي معيّن

لأنه المشاهدات لحالها ما بتبني بزنس

إذا عندك جمهور جاي من ترندات عشوائية، ممكن تحصل على ملايين المشاهدات، بس لما تطلق منتج او خدمة ما بكون واضح ليش الناس تشتري منك

وهذا السبب اللي بخلي كثير من صناع المحتوى، حتى اللي عندهم جمهور ضخم، لما يقرروا يفتحوا مشروع يروحوا غالباً للأشياء العامة مثل الأكل أو التجميل

مطعم، شوكولاتة، سناكات، عصائر…

أو منتجات ميكاب وعناية بالبشرة

لأنهم بفكروا: “كل الناس بتاكل” أو “كل البنات بدها ميكاب”، فبيحسوا انه هذا أسهل طريق

لكن المشكلة مش بالأكل أو التجميل

المشكلة انه جمهورهم مش مبني حول اهتمام أو مشكلة معينة، فبيكون صعب يعرفوا شو المنتج اللي يناسبهم

وبالنهاية يدخلوا أسواق فيها منافسة عالية جداً، بدل ما يكون عندهم ميزة واضحة بسبب البرسونال براند اللي بنوه

أما لما تربط اسمك بمجال محدد، أنت مش بس بتبني جمهور، أنت بتبني مجتمع

المشاهد بتابعك

لكن المجتمع بثق فيك وبشتري منك

اذا بتبيع بهارات، اعمل محتوى طبخ

اذا بتبيع خدمات ماركتنغ، اعمل محتوى ماركتنغ

اذا ناوي تدخل العقار، خلّي الناس تعرفك بهذا المجال

لأنه الناس مش دائماً بتشتري من الشخص الأشهر

بتشتري من الشخص اللي بتعتبره المرجع في الشي اللي تحتاجه

الهدف مش إنك تصير مشهور فقط

الهدف إنك تصير معروف بشي له قيمة

هاي من اهم الدروس اللي تعلمتها و انا بحاول ابني شي أكبر من مجرد حساب عليه مشاهدات